Monthly Archive for October, 2005

Villibráðarveisla Sigga og Kristínar 2005

Published
by
jens
on 30. October 2005
in Matur
. 2 Comments

Í gærkvöld var hin árlega villibráðarveisla Sigga og Kristínar. Undafarin ár hefur okkur Jónu verið boðið í bráðina sem er afrakstur veiðiskapar húsbóndans. Hann hefur veiðar einhvertíma eftir miðjan ágúst ár hvert og ber síðan á borð fyrir okkur creme du la creme af veiðiskapnum.

Í ár veiddi Siggi, rjúpu, gæs, önd, hreindýr, tófu og sel!!!

Ég prísa mig sælan að það tveir síðastnefndu hlutirnir voru ekki bornir á borð! Ég held reyndar að tófu- og selsveiðarnar heyri til undantekninga -þessi kvikyndi voru bara eitthvað þvælast fyrir framan hagglarann!

Í fyrra var veislan algjör snilld og eitthvað virðast sögur af því hafa komist á kreik, því þegar við Jóna og Jósef Ýmir mættum til veislu gengum við í fangið á blaðamanni og ljósmyndara Gestgjafans. Nú átti sko að dókjúmentera herlegheitin!

Og ekkert var slegið af snilldartöktum síðustu ára. 11 réttir í þetta sinn veségú. Og við vorum að borða frá 19.30 til rúmlega eitt um nóttina!

Menu:
Forréttir:
Rjúpusúpa að hætti Jónu

Grafin gæsabringa með bláberjavinaigrette

Grafin rjúpa

Gæsapate með rifsberjahlaupi

Grágæsacarpaccio með parmeasanosti

Aðalréttir:
Birkilegin grágæsabringa með villisveppasósu,
stykkilsberjasoðnum perum og rösti kartöflum

Önd með sólberjasósu,
gljáðum gulrótum og perlulauk

Hreindýrafillet og rjúpubringa
með villibráðarsósu, waldorf salati og rösti kartöflum

Eftirréttir:
Rabbabara-, jarðaberjabaka

Blönduð berjabaka

Borið fram með þeyttum rjóma og ís

Gestgjafinn sá um að velja vínin með matnum og þau komlimentuðu alveg bjútifullí. Agalega skemmtilegt t.d. að hafa sherrí með rjúpusúpunni! Hér á eftir fylgir umsögn sommeliers Gestgjafans um vín kvöldsins.

Vínseðill

Fordrykkur
Elegante Medium sherry frá Gonzalez Byass
Þurrt sherry, Amontillado, sem er búið til úr Palomino og Pedro Ximenez þrúgum og er geymt skv. crianzera og solera aðferð. Helsishnetur, möndlur – mjúkt og eðal. Framreiða kælt en ekki kalt (ca 15-16°). Þetta verður að vera þurrt þar sem nokkuð þungt er framundan!

Súpa og forréttir
Wolf Blass Shiraz með forréttunum (shérry-ið gæti alveg fylgt súpunni eftir) þar sem kryddið, berin og kryddjurtirnar sem fylgja þessari klassísku Shiraz frá Ástralíu eru tilvalin fyrir þessa rétti. WB Shiraz er ekki eingöngu berjabomba, og eikin er ekki of áberandi – réttirnir njóta sín og vínið líka.

Aðalréttirnir
Þar valdi ég vínið sem er mitt uppáhald í dag, Monte Garbi Ripasso, Valpolicella Superiore frá Tenuta Sant’ Antonio. Ripasso er svo til eingöngu notuð í Valpolicella, frir norðan Verona, og aðferðin fer þannig fram að berin eru tínd seint (20-25.10) og eru þurrkuð á strámottum í 15 d. Eftir það fer gerjun fram í 20 d. í stáltank, svo í eik í 1 ár. Á þessu tímabili er hrært reglulega í vínið til að byrja með, og loft blásið létt í það til að varðveita ferskleikann. Þetta vín tekur allt villibráð (ég var með námskeið um villibráð í gær og allir féllu í stafi við Monte Garbi!!): þetta er þétt vín og fallegt, létt sultuð kirsuber, sveitalykt, þurr krydd í lokin, lakkris… Svo langt eftirbragð líka.

Eftirréttir
Sætabomba í eftirréttunum kallar á brut freyðivín – ég valdi að sjálfsögðu Castell de Vilarnau Brut, sem er svo fágað og vel gert að sýran í víninu heldur velli á móti sýrunni í rabarbaranum .

Stefnt var að því að toppa síðasta ár og ég held að það hafi tekist alveg fullkomlega! Þetta er eitt svakalegasta matarboð sem ég hef lent í um mína daga. Mig er strax farið að hlakka til næstu veislu!

Hvað er að?

Published
by
jens
on 23. October 2005
in Morgunblaðið
. 2 Comments

Ég skil hreinlega ekki af hverju þjóðfélagið er ekki orðið brjálað, gengið af göflunum? Af hverju er fólk ekki fyrir utan allar bæjarskrifstofur á höfuðborgarsvæðinu með kröfuspjöld? Er hægt að líða þetta ástand miklu lengur?

Um hvað ræðir?
Málefni ófaglærðra leiðbeinenda á leikskólum virðist ekki mjög fyrirferðarmikil í þjóðfélagsumræðunni um þessar mundir þrátt fyrir að laun þeirra sem passa börnin okkar séu skammarlega lág og atgervisflótti frá þessum störfum gríðarlegur. Raskið sem fjölskyldur verða fyrir er verulegt. Foreldrar þurfa að taka sér frí frá vinnu með tilheyrandi launamissi. Og reynt er að brúa daginn með því að senda börnin milli ættingja og vina. Börnin verða fyrir mesta raskinu, þeirra daglega tilvist og sjálfsöryggi bíður hnekki.

Svona er ástandið víða á höfuðborgarsvæðinu, þó þekki ég það hvað best í mínu sveitarfélagi, Kópavogi. Hér hafa ófaglærðir leiðbeinendur á leikskólum nýlega fellt samning við launanefnd sveitarfélaga og erfitt að sjá fyrir lyktir þeirra mála.

Klárum við daginn?
Á meðan reynir það starfsfólk sem eftir er á leikskólunum að halda úti eðlilegri starfsemi. Þó er það svo að margir leikskólastjórar hefja hvern dag á að telja börnin sem koma, síðan starfsfólkið og fara síðan í að reikna út hvort það sé mannafli til að klára daginn. Ef ekki setur leikskólastjórinn sig í samband við foreldra og biður þá að sækja börnin, með þeim rökum að það sé einfaldlega ekki mannafli til að sinna þeirri þjónustu sem leikskólanum ber samkvæmt lögum og foreldrar hafa greitt fyrir.

Það er með öllu ólíðandi að þetta neyðarástand skapist hér á hverju hausti. Sinnuleysi bæjaryfirvalda í Kópavogi er algert á meðan nágrannasveitarfélög grípa í haustplástrapakkann. Með því á ég við þá lensku að redda málunum fyrir horn í þetta sinn og glíma svo aftur við þau að ári með sömu plástraaðgerðum, ergo eingreiðslur og álagsgreiðslur.

Sveitarstjórnarmaður ársins
Er ekki tími til kominn að leysa þessi málefni til frambúðar. Er hægt að bjóða fjölskyldum í landinu upp á þetta ástand miklu lengur?

Við heyrum fregnir af fólki sem flykkist af leikskólunum, jafnvel í önnur störf hjá sveitarfélaginu. Mér er í fersku minni pólskur innflytjandi sem gafst upp á því að vinna á leikskóla, launin voru svo lág. Hann fór að grafa skurði og vinna í skólpi fyrir sama sveitarfélag á helmingi hærri launum. Hann sagðist sakna vinnunnar á leikskólanum en hann gæti einfaldlega ekki lifað af þeim.

Sveitarstjórnarmaður ársins er sá aðili sem viðurkennir að laun þessarar starfsstéttar eru fyrir neðan allar hellur og ekki sæmandi í velferðarríkinu Íslandi.

_______________________________________
Greinin birtist áður í Morgunblaðinu, 23. október 2005.

Norðurlandaráð æskunnar

Published
by
jens
on 21. October 2005
in Stjórnmál
. 1 Comment

Á morgun hefst Norðurlandaþing / Norðurlandaráð æskunnar (er ekki alveg viss á þýðingunni) en á einhverju máli (sjálfsagt sænsku) heitir fyrirbrigðið Ungdommens Nordisk Rad. Eða UNR fyrir okkur hin.

UNR þjónar sama tilgangi og undir 21 árs landsliðsleikir sem eru haldnir í aðdraganda ,,fullorðins” landsleikja -svona stemmings stemmings eitthvað. Ég verð reyndar að viðurkenna að ég veit ekki alveg hvaða tilgangi það þjónar að tapa alltaf tvisvar í sömu vikunni fyrir sömu þjóð í knattspyrnu? Af einhverjum ástæðum hélt ég að samlíkingin myndi vera hipp og kúl og varpa ljósi á mikkla þekkingu mína á hinni fornu íþrótt.

Hvað er ég aftur að tala um?

Já! Ég er s.s. að fara á þetta UNR þing um helgina. Afar stoltur fulltrúi minnar þjóðar, flokks og kynhneigðar.

Þeir sem eru ótrúlega spenntir fyrir Norðurlandaþingum æskunnar (sjálfsagt þeir sömu og fara á unglingalandsliðsleiki?) er velkomið að koma í þjóðmenningarhúsið um helgina og sjá okkur í aksjón. Þetta verður ótrúlega spennandi, hvað gera Svíar, koma þeir með eina ályktun upp úr þurru á laugardeginum -eða verða finnarnir drukknir // sofandi í pontu? Verður smuguholusíldarstækja af Norðmönnunum? Og hvað með Danina? Já hvað með þá?

Þið komist að þessu og svo miklu miklu fleira um helgina í ðí nations culture house!

Hej hej.

Party Shuffle

Published
by
jens
on 19. October 2005
in Tónlist
. 0 Comments

Stundum kemur alveg ótrúleg blanda í party shuffle í iTunes! Sem ber bæði vott um mjög óheilstætt og steikt tónlistarsafn mitt hér á kontornum.

Síðustu 3 lög í eyrað:
The life of the King - ljóðaupplestur - Charles Bukowski
In da club - 50 cent
Hvað ég vil - Lonlí blú bojs

Áhugavert?