Monthly Archive for October, 2006

Íhaldsemi Morgunblaðsins

Published
by
jens
on 31. October 2006
in Framboð and Skrif
. 0 Comments

Ég er með grein í pípum Morgunblaðsins sem bar yfirskriftina: 73%.

Fyrirsögnin vísar í pælingar höfundar um að 73% þjóðarinnar séu fylgjandi hvalveiðum í atvinnuskyni.

Ég var farin að sakna þess að sjá greinina ekki á síðum blaðsins. Síðan kom skýringin. Það var hringt í mig áðan frá Mogganum:

,,Já er það Jens?”

,,Jú það er hann.”

,,Þetta er á Morgunblaðinu. Heyrðu þessi fyrirsögn gengur ekki?”

„Nú?”

„Nei, þú getur ekki notað prósentutölu í fyrirsögn.“

„En ef ég skrifa p r ó s e n t ?“

„Nei, gengur ekki, verður að vera efnisleg fyrirsögn. Já og millifyrirsagnirnar ganga ekki heldur.“

„Nú?“

„Jú, það gengur ekki að hafa útlensku, t.d. live from Hvalfjörður, gengur ekki! Svo eru hinar allt of langar! Ég hendi bara greininni -þú sendir okkur nýja!“

„Má hún fjalla um hvalveiðar?“

„Ha? Já, lagaðu þetta bara og sendu okkur nýja.“

Jæja, það verður þá bara að vera þannig. Mogginn á sögulegan rétt á sinni íhaldssemi. Ég er samt dáldið skúffaður, mér fannst 73% vera skemmtileg nýjung í fyrirsagnaflóruna! Ég hugsaði lengi hvort ég gæti ekki fundið einhverja hallærislega fyrirsögn í staðin, t.d. með z -datt í hug, Bezti vinur þinn eða eitthvað í þeim dúr.

Að endingu fannst mér þó fyrirsögnin Langreyður borgari lýsa best lundarfari mínu eftir samtalið og jú að einhverju leyti efni greinarinnar. Ég vona að lesendur Morgunblaðsins fái að bera greinina augum!

Nei Björn, við viljum að þú leiðir

Published
by
jens
on 31. October 2006
in Satíra and Stjórnmál
. 0 Comments

Ég var að lesa varnargrein Björns Bjarnasonar að afloknu prófkjöri. Hún er í eðli sínu ágæt tilraun laskaðs stjórnmálamanns til að fegra sinn magra hest!

Það er þó ein, tvær eða þrjár rökvillur í málflutningi Björns sem birtast helst í þessum orðum:

Mér þótti grein Jóns Baldvins Hannibalssonar í Morgunblaðinu á sjálfan prófkjörs-laugardaginn staðfesta þá skoðun mína, að framganga hans í þessu máli markaðist öðrum þræði af viðleitni til að gera hlut minn í prófkjörinu sem verstan. Það verður spennandi að sjá, hvernig umræður um þessi mál þróast, nú þegar prófkjörinu er lokið.

Nei Björn, okkur langar að hafa þig í forystu! Sjálfstæðismönnum hefur aldrei vegnað verr en þegar þú hefur leitt þá. Ingibjörg Sólrún fer svo ofboðslega í taugarnar á þér að þú missir algjörlega það litla sem eftir var af kjörþokkanum. Ef við í Samfylkingunni mættum ráða þá væri búið að þinglýsa þér í efsta sætið -helst í báðum kjördæmum!

Í öðru lagi Björn, þá tekur Styrmir (vinur þinn?) sig til og birtir grein Jóns Baldvins á miðopnu Moggans á prófkjörsdaginn. Hefði það skipt Morgunblaðið einhverju máli fyrir hann að birta greinina hans Jóns t.d. í sunnudagsblaðinu?

Í þriðja lagi Björn, þá átt þú að líta þér nær. Þessi drulluspaðaárás kemur bara úr þínum eigin flokk. Sjáðu t.d. árásina sem vinur þinn Gísli Marteinn varð fyrir í vor. Voru það kannski sömu menn sem réðust nú á þig og gerðu 15 ára gamlar stærðfræðieinkunnir Gísla úr Verzló að aðalmáli kosninganna? Getur verið að það sé einhver Karl Rowe-ísk maskína að fæðast innanbúðar sem ræðst einungis á samherja með svona ómaklegum hætti?

Nei Björn, frjálshyggjan er hin fullkomna andhverfa jafnaðarstefnunnar og ávalt óska-keppinautur okkar um atkvæði kjósenda. Það hreinlega hryggir mig hvað ykkur gengur illa að komast til valda ;-)

Gutti TOPPmaður

Published
by
jens
on 30. October 2006
in Samfylkingin and Stjórnmál
. 1 Comment

Nú er það ljóst að Guðbjartur Hannesson (Gutti), skólastjóri af Akranesi, bar sigur úr bítum í prófkjöri okkar Samfylkingarinnar í NV-kjördæmi.

Nú er það ljóst að Gutti er einhver mesti öðlingur sem ég hef unnið með á vettvangi stjórnmálanna og ég gæti ekki verið glaðari fyrir hönd flokksins: ,,you have chosen wisely!”

Þegar ég var starfsmaður Framtíðarhópsins átti ég mikið og gott samstarf við Gutta. Hann er hugmyndafræðilega sterkur og ljúfmenni í samskiptum, alþýðlegur en fylginn sér. Hann er alltaf tilbúinn að hlusta á nýjar hugmyndir, og leiðir en hefur þó sjálfur miklar og háleitar hugmyndir um samfélagið, sérstaklega um menntamál, eins og Skagamenn þekkja best. Skólinn sem Gutti stýrir, Grundaskóli, fékk einmitt menntaverðlaun Forseta Íslands í fyrra.

Það er ljóst að mikill liðsstyrkur á leiðinni í þingflokk okkar jafnaðarmanna. Ég hlakka mjög til að sjá Gutta í eldlínu stjórnmálanna, á Alþingi, og vænti mikils af þessum sómamanni!

Kjötkveðjuhátíð Samfylkingarinnar

Published
by
jens
on 28. October 2006
in Dagbók and Framboð
. 1 Comment

Síðustu tvær helgar hafa meðframbjóðendur mínir verið með opnanir, uppákomur og annað húllumhæ á kosningaskrifstofum sínum. Jafnaðarmaðurinn Jensi hefur lagt sig fram um að mæta á alla þessa atburði, bæði vegna þess að jafnaðarmaðurinn Jensi er jafnaðarmaður og vill gera öllum jafnt undir höfði (þessi punktur þarfnaðist kannski ekki útskýringar?) en líka hef ég bara svo gaman af því að vera úti á meðal flokksmanna og kjósenda.

Ég hef sjaldan upplifað aðra eins stemmingu í flokknum og samkennd frambjóðenda hefur vakið eftirtekt. Flokksmenn virðast lukkulegir með valkostinn enda hvergi meiri fjöldi frambjóðenda en einmitt hér í Kraganum, 19 manns.

Ætli prófkjör sé ekki einhverskonar heimsmeistarakeppni stjórnmálaflokks, eða kjötkveðjuhátíð? Uppskeruhátíð? Allavega líður mér þannig. Karnivalið er á fullu og flokkurinn í fínu formi. Framtíðin er björt hjá flokki sem hefur slíkan her tilbúinn að vinna hugsjónum okkar gagn.

Spennan magnast og síðasta vikan í sigtinu. Mikið er gaman að vera þátttakandi í kjötkveðjuhátíð Samfylkingarinnar!