Í sumarblíðu gærdagsins ákvað smáfjölskyldan að skunda í hjarta höfuðborgarinnar, sleikja sólina og spísa góðan mat í hádeginu.
Austurvöllur var valinn en þó ekki fyrr búið var að koma við á Serrano og kaupa nokkra litla asna (ATH!) til að borða í blíðunni.
Mikið afskaplega var smá-asninn góður en sorphaugurinn sem áður hét Austurvöllur eyðilagði lítt eitt matarlystina.
Er Austurvöllur ekki hjarta miðborgarinnar: miðstöð stjórnmála, kristni, kaffidrykkju, hótelreksturs, súlu- og símstöðva hér í landi?
Austurvöllur er líka um 100m frá Ráðhúsi Reykjavíkur þar sem Gamli(g)óði-Villi vinnur.
Var það ekki einmitt helsta kosningamál Gamla(g)óða-Villa að hreinsa borgina sem var svo ógeðsleg eftir valdatíma R-listans? Var hreinsun borgarinnar kannski bara bundin við Breiðholtið, nánar tiltekið ein undirgöng í Breiðholtinu?
Austurvöllur var a.m.k. morandi í sígarettustubbum, glerbrotum, umbúðum, ílátum, drykkjarföngum o.s.frv. Ég fékk það á tilfinninguna að hér hefði ekki verið hreinsað í háa herrans tíð (les: síðan Steinunn Valdís lét af embætti.)
Í dag fórum við síðan í Nauthólsvík og þar var sama sagan, rusl út um allt.
Ég veit að miðborg Reykjavíkur og Nauthólsvíkin eru ekki jafn fjölskylduvænir staðir og Breiðholtið, enda allt morandi í grænfriðungum og spilakössum þar um slóðir - en - Kæri Gamli(g)óði-Villi gætir þú séð sóma þinn í því að senda hreinsunardeildina a.m.k. einu sinni í mánuði á þessa fjölsóttu staði?
_________________
ATH!: hvert er íslenska heitið yfir burrito?
Burro er það ekki asni á spænsku og -it(o/a) smækkunarending? Spyr sá sem ekki veit.
