Monthly Archive for September, 2007

Leikskóli til sölu …húsnæðið má nota til annara hluta!

Published
by
jens
on 28. September 2007
in Almennt
. 0 Comments

Fyrirtækjasalan rekur vef þar sem hægt er að kaupa og selja fyrirtæki á, að mér þykir, frekar háu verði. Þetta eru til mikið sjoppur, hárgreiðslustofur, efnalaugar og pöbbar sem rúlla þarna í gegn.

Ég rak þó í rogastans þegar ég sá eftirfarandi auglýsingu:

LEIKSKÓLI
„Leikskóli í nýlegu húsnæði og með öllum leiktækjum úti í garði jafnt sem inni.Pláss er fyrir 56 börn og alltaf fullbókað.Auðvelt hefur verið að fá starfsfólk fram til þessa. Eigandinn er að ljúka Dokltorsprófi og selur þessvegna. Húsið er í mjög góðu standi enda nýlegt.Gott eldhús með vönduðum tækjum til allra eldunarstarfa.Biðlisti eftir plássum. Öll leyfi til staðar.KJörinn vettvangur fyrir einstaklinga þar sem eftirspurnin er langt fram úr framboði á plássum. Húsið er nýlegt og á mjög eftirsóttum og vinsælum stað þar sem það gerir ekkert nema hækka í verði og það mjög mikið.Nægt starfsfólk er til staðar og hefur alltaf verið.Einnig er hægt að nota húsið undir aðra starfsemi td. fyrir sérhópa, félagsheimili fyrir ýmsa hópa eins og Lions, Kiwanis stjórnmálaflokka og til fjölbreytilegra starfa.“

Þetta er magnað á svo margan hátt. Fyrir það fyrsta vissi ég ekki að leikskólar gætu gengið kaupum og sölum með þessum hætti. Ég hélt að bæjarfélögin gerðu samninga um rekstur við ákveðna aðila, við sölu yrði að endurskoða allt slíkt. Ég myndi a.m.k. vilja semja þannig að bæjarfélagið hefði ekkert um það að segja hverjir væru rekstrar- og uppeldisaðilar leikskólabarna.

Þetta hlýtur líka að vera eini leikskólinn í Kópavogi sem á hreinlega AUÐVELT með að fá starfsfólk.

Steininn tók þó endanlega úr í niðurlagi auglýsingarinnar að það væri hægt að nota húsið undir aðra starfsemi s.s. Lions, Kiwanis og stjórnmálaflokka.

Aftur, þá þykir mér fáránlegt að leikskólaverktaki geti rekið hvaða starfsemi í húsnæðinu sem honum lystir. Sem foreldri leikskólabarns hefði ég ekki mikinn áhuga á að leikskólinn væri nýttur undir skemmtanir ýmiskonar kallaklúbba og stjórnmálaflokka að skólastarfi loknu: Bjórkvöld hjá Ungum Framsóknarmönnum á leikskólanum Hvarfi? Þorrablót Lions verður haldið í leikskólanum Baugi?

Nei fjandakornið. Mér er spurn: er þetta eitthvað grín? Má þetta, í alvöru?

Laugardagur …til leikskóla!

Published
by
jens
on 22. September 2007
in Sveitarstjórnarmál í Kópavogi
. 4 Comments

Ég var að taka til í skrifborðinu mínu er ég rakst á gamla afmælisgjöf frá Barða frænda frá árinu 2005 og kort með sem á stóð:

Megi dagur hver fegurð þér færa
Og megirðu gera orð stjórnmálaskörungsins að þínum þegar hann sagði:
,,Rödd unga fólksins má ekki kafna í hjali um óperuhallir og malbik…”
og við leggjum sérstaka áherslu á malbikið!
En gleðilegan afmælisdag og farsælar komandi sveitarstjórnarkosningar!
Dansk-íslenska vináttufélagið

Þetta er í fyrsta og eina skiptið sem ég fæ afmæliskort með tilvitnun í sjálfan mig!

En þetta kort leiddi hugann eftir sínum venjubundnu og óskiljanlegu leiðum að morgunspjalli okkar hjóna um tillögur leikskólanefndar Kópavogsbæjar sem kynntar voru í gær í fjölmiðlum með pompi og prakt.

Jóna situr í leikskólanefnd og hún var að segja mér að þessar tillögur hafi ekki verið lagðar fyrir á síðasta fundi. Þær hafa samt verið samþykktar í bæjarráði. Merkilegt vinnuferli það.

Jóna sagði mér líka að meirihlutinn væri búinn að vera að vinna að einhverjum töfratillögum í nokkurn tíma sem minnihlutanum hafi verið meinað að sjá, þrátt fyrir ítrekaðar beiðnir.

Á síðasta fundi sótti minnihlutinn sérstaklega eftir því að sjá tillögur meirihlutans þar sem lungann úr fundinum fór í að ræða mannekkluna á leikskólum bæjarins.

Samfylkingin hafði áður lagt til nokkra hluti sem gætu mögulega laðað að starfsfólk, t.d. að bjóða námsstyrki til leikskólakennaranáms gegn vinnuskuldbindingu við bæinn að námi loknu og að auka á rétt fólks til að sækja sér viðbótarmenntun. Það var jafnframt skoðun minnihlutans að starfsfólk leikskólanna væri hreinlega ekki nógu vel launað. Það væri mjög einföld leið til að sporna gegn mannekklu að bjóða mannsæmandi laun.

Og ef ég lista upp töfratillögurnar frá meirihlutanum af Mbl.is rétt sem snöggvast, þá eru þær:

  • Aukin tækifæri starfsmanna til náms í leikskólafræðum og aukið faglegt öryggi í starfi.
  • Stjórnendum gert kleift að sækja stjórnunarnám sem er sérsniðið að þörfum þeirra.
  • Bætta vinnuaðstöðu og námskeið sem miða m.a. að því að draga úr streitu.
  • Kjarabætur, s.s. auknar greiðslur vegna kostnaðar í starfi og námsstyrkir.
  • Tilraunaverkefni á tveimur leikskólum með aukið fjárhagslegt og faglegt sjálfstæði að leiðarljósi.
  • Erlendum starfsmönnum verði boðið íslenskunámskeið á vegum bæjarins.

Nú skilur maður af hverju meirihlutinn hefur verið svona lengi að leiða þetta fram. Hann hefur væntanlega verið að bíða eftir hugmyndum frá minnihlutanum til að gera að sínum.

Samúel Örn: ,,svona gera menn ekki!”

Ljóðafé

Published
by
jens
on 19. September 2007
in Mæli með
. 0 Comments

Ég festi kaup á bók í dag sem er fullkomlega ekki í frásögur færandi nema fyrir þá einföldu staðreynd að bókin er ekki enn farin í prentun. Og ég veit fátt eitt um bókina annað en hún er ljóðabók eftir ljóðskáld sem mér hugnast.

Eirkíkur Örn Norðdahl hefur brugðið á það nýstárlega ráð að fjármagna prentkostnað nýjustu ljóðabókar sinnar …bla bla bla …þetta stendur allt á síðunni hans …og hann er að bíða eftir heimsókn frá þér.

Þetta verða þá mótvægisaðgerðir mínar í ár.

Sagan af rúminu góða - KLESSA Á!

Published
by
jens
on 19. September 2007
in Almennt
. 0 Comments

Eftir árangurslausar tilraunir mínar að tjasla saman gamla barnarúminu mínu, stórastrákarúminu, tókst Jónu að sannfæra mig um að það væri sniðugra fyrir Jósef Ými að fá bara nýtt rúm í Ikea. Eftir að hafa slitið á tilfinningaleg tengsl við bernskurúmið ákvað ég að leiðast af skynsemi konu minnar.

Á laugardag lögðum við í innkaupaleiðangur og keyrðum af stað í úrhelli niður í Garðheima þar sem staðarhaldarar voru búin að lána okkur skutbíl til kaupanna.

Þegar við vorum komin á bílaplanið þar og Jóna búin að stöðva bifreiðina kemur jeppapungur á fullri ferð, í bakkgír og stefnir beint á okkur. Jóna leggst á flautuna en ekkert hægir hann á og kemur að endingu á fullum þunga inn í frambrettið ökumannsmegin, mölvar ljósin, stuðarann og dældar brettið svo rosalega að það fer inn í dekkið, bíllinn óökufær og við þurftum að hringja á dráttarbíl.

Öllum heilsast vel. Reyndar hafði sonur minn bara gaman af þessu og segir nú spakur reynslusögur af sjálfum sér þar sem orðin „KLESSA Á“ ber nokkuð á góma.

Ferðin í Ikea var ekki síður skemmtileg fyrir snáða sem fékk að sitja í „riiiisa-stóóóra bílnum“ og gnæfa yfir umferðinni.

Ökuníðingurinn á jeppanum hafði borið fyrir sig þær varnir að hann hefði ekki séð okkur, bíllinn væri svo lítill. Við vorum náttúrlega sárlega móðguð fyrir hönd græna jafnaðarmannsins og veltum því nú mjög fyrir okkur hvort við eigum að selja Volvoinn og fá okkur sendiferðabíl til að tryggja öryggi okkar í umferðinni?

Græni jafnaðarmaðurinn lifir góðu lífi á réttingaverkstæði Hjartar á Smiðjuveginum og við ökum um bæinn á bílaleigubíl (og reiðhjóli.) En sonurinn er afar ánægður í nýja rúminu og sefur vel.